Sourdure – « De mòrt viva » (Les Disques du Festival Permanent, Pagans, Murailles Music)

Cronica musicala

V-una annada claus chès se, v-una annada de creacion. Coma la vacha foai le vedèl, Sourdure a foait le disc, un viatge diens l’ola sonora de l’Ernest le facinèir.
‘Na votz de còps clara, de còps coma la crida d’un muslim. De brus de çai, de ramagilhas de melodia de lai, mesclats. Le chin d’una viela man dreita, ‘na fiara trompeta – fugesse de corgola – man mansa. De sons gafets e de sons raides corduts ensems.
« Campes ton camp dans un enclos aux fers gardés » . Clarament, quela emardacion d’embarament passèt par aquí, a-sus naut, a la cima de la velha viala d’ès Tiern.
‘Bei son escritura talhada ‘ma le fiau d’una lama, Sourdure nos parla de la ruptura, de la surprisa de veire tot par un còp le monde s’arrestar. Nos parla de nòstra paur de ne’n jamoai veire la fin maugrat nòstra colera. E dit sobretot l’enveja totjorn moai fòrta de viure, de pamparinar, d’amar.
E se era le Sant Joanis o ben le Dosgilbert d’avora que los bitòres peiton pus, le chansonaire nòu d’una viala endermida que se soven pus dau plaser de biure bon vin, que siatge par reire o purar ?
Non pas. Sourdure es moai qu’un ciutadan espiant son epòca de sa fenestra. Sab la litteratura coma le populare, sab son Melhau (« A tota perta sa rason foaita, a tota rason fòrça cresença ») coma sas vira-lenga que valon moai par lhur candença, fuguesse la d’un rap american, que par las istoeras que conton (Clavar, cavar). Sab la derision de las vespres que aicí se font moai poeticas que de costuma, coma le contengut de nòstras budalhas quant la lucididat nos prend.

Laurenç BÒSTIAS

https://phonolithe.fr/boutique/albums/2483-sourdure-de-mort-viva-3516628335525.html

 

ramagilhas : restes de nourriture à la fin d’un repas
corduts : amassés, rassemblés
pamparinar : faire la bringue
bitòres : « bitords », surnom des habitants de Thiers